„Eins og fjárlagafrumvarpið lítur út við fyrsta yfirlestur boðar það ekki eins miklar breytingar og margir áttu ef til vill von á. Mér finnst frumvarpið sýna að ríkisstjórnin hafi áttað sig á að ekki er hægt að framkvæma allar þær breytingar sem boðaðar höfðu verið í einu, þ.e.a.s. lækka skatta, minnka skuldir og halda uppi velferðarkerfinu á sama tíma,“ segir Elín Björg Jónsdóttir formaður BSRB um fjárlagafrumvarpið sem lagt var fram á Alþingi í dag.
„Aðhalds- og niðurskurðarkröfur virðist eiga að vera nokkuð almennar og það er erfitt að sjá við fyrstu sýn hvaða áhrif þetta mun hafa t.d. fyrir velferðarkerfið og hvort við megum vænta fjöldauppsagna starfsfólks í almannaþjónustunni,“ segir Elín Björg og bætir við að sér finnst vanta nokkuð upp á efnd loforða í fjárlögunum.
„Ríkisstjórnin var kosin út á stór og mikil loforð en lítið af þeim sjást í frumvarpinu. Þar er ekkert um 12-13 milljarða inn innspýtingu til Landsspítala líkt og lofað var í aðdraganda kosninga en þess í stað fellt út 600 milljóna tímabundið framlag til tækjakaupa. Það eru nokkur vonbrigði,“ segir Elín Björg.
Fram kemur í frumvarpinu að vaxta- og barnabætur verði ekki skertar á komandi ári og þá á að lækka milliskattþrep tekjuskatts einstaklinga um 0,8%.
„Það mun gagnast mörgum vel en aftur á móti hækka frítekjumörk ekki og lækkun fyrsta skattþrepsins hefði komið betur við þá sem allra lægstu launin hafa. Ég tel það jákvætt að ekki komi til skerðingar á vaxta- og barnabóta á næsta ári. Hins vegar þýðir það að ekki verði komið á samræmdum húsnæðisbótum sem eykur enn á ósamræmi milli þeirra sem bú í eigin húsnæði og þeirra sem kjósa frekar að leigja,“ segir Elín Björg sem hefur einnig nokkrar áhyggjur að innheimta eigi sérstakt legugjald fyrir þá sem veikjast og þurfa að leggjast inn á spítala og að hækka eigi komugjöld á sjúkrastofnanir.
„Bendi ég í þessu sambandi á skýrslu sem var gerð fyrir Krabbameinsfélagið og sýnir fram hvaða áhrif það getur haft á fjárhag fólks að veikjast alvarlega og lenda inni á sjúkrahúsi. Í mörgum tilfellum skapast mikill fjárhagsvandi hjá þeim sem veikjast og ég vara þess vegna mjög við því að auka þessi gjöld því nægur er kostnaðurinn fyrir. Lykillinn að góðu samfélagi er jöfnuður fólks og hann næst best með öflugu velferðarkerfi sem rekið er á samfélagslegum grunni. Það kerfi verðum við að efla eins og kostur er,“ segir Elín Björg.