BSRB óskar nýrri ríkisstjórn Katrínar Jakobsdóttur forsætisráðherra velfarnaðar og fagnar því samtali um mikilvæga málaflokka sem boðað er í stjórnarsáttmálanum.
Í sáttmálanum boðar ríkisstjórnin aukið samráð við vinnumarkaðinn um sterkara samfélag. BSRB mun að sjálfsögðu taka þátt í slíku samráði með það að leiðarljósi að ná sátt um þau stóru mál sem bíða.
Við lestur á stjórnarsáttmála nýrrar ríkisstjórnar vakna ýmsar spurningar enda margt þar sem þarf að skýra betur, enda ekki við því að búast að hægt sé að útfæra nákvæmlega stefnuna í einstökum málum í því skjali. Með hliðsjón af stefnu BSRB er orðalag sáttmálans á köflum jákvætt en fátt fast í hendi um áform stjórnarinnar í mikilvægum málaflokkum eftir lesturinn.
Vonandi þýðir þetta það eitt að ríkisstjórnin sé ekki búin að binda sig við nákvæma útfærslu í þessum málaflokkum og að hægt verði að koma þar að sjónarmiðum félagsmanna aðildarfélaga BSRB og annars launafólks.
Á endanum eru það efndirnar sem skipta máli. Ljóst er að risavaxin verkefni bíða ríkisstjórnarinnar og miklar væntingar landsmanna eru til bæði breytinga á landslaginu í íslenskum stjórnmálum og auknum félagslegum- og efnahagslegum stöðugleika. BSRB óskar nýrri ríkisstjórn velfarnaðar og lýsir yfir vilja sínum til samstarfs.