Sumarlokanir áhyggjuefni

Landspítalinn áætlar að um 20% rúma spítalans verði ekki í notkun nú í lok júlí vegna sumarlokana á spítalanum. Í fréttum fjölmiðla hefur komið fram að fleiri rúmum verði lokað á lyflækningasviði nú en í fyrra þar sem ekki hefur tekist að manna stöður hjúkrunarfræðinga í sumarfríi.

Það er áhyggjuefni að sumarfrí starfsmanna hafi svo mikil áhrif á starfsemi spítalans. Þessi staða endurspeglar að einhverju leyti það fjársvelti sem spítalinn hefur búið við árum saman.

Í stefnu BSRB er lögð áhersla á mikilvægi útgjalda til heilbrigðismála. Þau útgjöld eru í raun grundvallarforsenda hagvaxtar enda gerir góð heilsa fólki kleyft að vinna og skila sínu til samfélagsins.

Kallað eftir auknum fjárframlögum
Í stefnunni segir meðal annars: „Hið opinbera á að reka heilbrigðiskerfið á réttlátan hátt fyrir skattfé landsmanna. Kerfið á að vera skilvirkt og tryggja öllum jafnan aðgang að fyrsta flokks þjónustu. Þetta er mikilvægur þáttur þess að viðhalda öryggi og lífsgæðum fólksins í landinu.“

Landsmenn hafa ítrekað kallað eftir því að bætt verði verulega í fjármögnun heilbrigðiskerfisins. BSRB tekur undir það ákall.