Karlar í stjórnunarstöðum, ólaunuð vinna á heimilum og kynskiptur vinnumarkaður er meðal þess sem hefur leitt til þess að óútskýrður launamunur kvenna innan ríkja Evrópusambandsins (ESB) mælist nú 16,3%.
Miðað við 16,3% launamun má segja að konur innan ESB vinni launalaust það sem eftir er af árinu, samkvæmt samantekt Evrópusambandsins um kynbundinn launamun.
Tekið hefur verið tillit til styttri vinnutíma á vinnustað, lægra tímakaups og minni atvinnuþátttöku í tölunum, en séu þeir þættir ekki teknir út fyrir sviga sést að tekjur kvenna eru að meðaltali 39,6% lægri en tekjur karla innan ríkja ESB.
Fimm skýringar eru sagðar helstar á óútskýrðum launamuni kvenna í samantekt ESB:
- Karlar í yfirmannastöðum, sem birtist meðal annars í því að aðeins 6% forstjóra fyrirtækja eru konur.
- Ólaunuð vinna á heimilum og tengt fjölskyldu, sem konur vinna í mun meira mæli en karlar.
- Tímabundin fjarvera kvenna frá vinnumarkaði, til dæmis í tengslum við barneignir.
- Kynskiptur vinnumarkaður þar sem konur tilheyra frekar starfsstéttum sem eru verr launaðar en starfsstéttir þar sem karlar eru í meirihluta.
- Launamismunun, sem viðgengst enn þrátt fyrir að hún sé ólögleg.
Eins og fjallað hefur verið um á vef BSRB er kynbundinn launamunur að aukast hjá hinu opinbera á Íslandi samkvæmt mælingu Hagstofu Íslands. Þá hefur verið fjallað nánar um áhrif þess að konur vinni frekar ólaunuð störf á heimilum og við umönnun en karlar.