Mikill áhugi á fræðslu um starfslok

Rúmlega 80 félagar í aðildarfélögum BSRB sátu í gær fræðslufund um starfslok. Á fundinum var fjallað um áskoranir og tækifæri sem fylgja þessum tímamótum.

Góðar umræður mynduðust á fundinum, sem stóð í tæpar fjórar klukkustundir. Þar fór til að mynda Ásta Arnardóttir, sérfræðingur Tryggingarstofnunar yfir réttindi lífeyrisþega. Þá mættu sérfræðingar frá lífeyrissjóðum fundargesta til að fara yfir réttindi þeirra hjá sjóðunum.

Þó mikilvægt sé að þekkja réttindi sín á tímamótum sem þessum er ekki síður mikilvægt að ræða það sem hægt er að hlakka til við starfslok, og hvernig hægt er að forðast það sem getur farið úrskeiðis.

Mikilvægt að njóta lífsins
Elín Björg Jónsdóttir, formaður BSRB, ræddi við fundargesti um framtíðarskipan lífeyrismála, áform um hækkun lífeyristökualdurs og endurskoðun almannatrygginga. Hún fjallaði líka um mikilvægi þess að njóta lífsins, enda mörg kærkomin ár eftir hjá flestum sem setjast í helgan stein.

Elín minnti á mikilvægi þess að hreyfa sig reglulega, stunda tómstundir og félagslíf, og ráðlagði fundargestum að gera áætlun um hvernig þeir ætla að verja tímanum nú þegar þeir hætta að verja tíma sínum í launaða vinnu.

Erindi Jóhanns Inga Gunnarssonar sálfræðings vakti miklar umræður. Hann fjallaði um það sem hann kallar „ár fullþroskans“, sem eru árin eftir starfslok. Hann fór meðal annars yfir það sem hægt er að gera eftir starfslokin, til dæmis að rækta fjölskylduböndin, ferðast, lesa, spila, fara í golf, dansa, gefa af sér, leggja rækt við trú, fara í gönguferðir, hitta fólk og eignast nýja kunningja.

Óþrjótandi möguleikar
Jóhann Ingi ráðlagði fundargestum að halda sér virkum og gæta þess að hafa eitthvað fyrir stafni. Möguleikarnir eru enda óþrjótandi. Hann varaði við hættu á einangrun og neikvæðum félagsskap og hvatti fólk til að varðveita sjálfstæði sitt og virða jafnframt sjálfstæði annarra.

Fræðslufundir vegna starfsloka fyrir félaga í aðildarfélögum BSRB eru haldnir reglulega hjá BSRB. Félögin senda út boð fyrir næsta fund og full ástæða til að hvetja þá sem stefna á starfslok að vera með okkur næst.

Fylgdu BSRB á Facebook
Fylgstu með BSRB á Facebook til að fá reglulega fréttir af því sem er að gerast hjá Bandalaginu.