Viðræður um mögulega sameiningu SFR og Starfsmannafélags Reykjavíkurborgar (St.Rv.), tveggja aðildarfélaga BSRB, hafa gengið vel og er áformað að kjósa um sameininguna í báðum félögum í byrjun nóvember.
Fram kemur í frétt á vef SFR og í frétt á vef St.Rv. að opnuð hefur verið sérstök vefsíða með kynningarefni vegna atkvæðagreiðslunnar. Þegar hafa verið haldnir nokkrir vinnustaðafundir og til stendur að halda fjölmarga fundi til viðbótar víða um land á næstu viku, auk þess sem opnir félagsfundir verða haldnir í félagamiðstöðinni við Grettisgötu 89.
Samstarf félaganna hefur staðið yfir í áratugi og síðastliðið ár hafa stjórnir félaganna, trúnaðarmenn og fulltrúar unnið að því að skoða mögulegan ávinning þess að sameina þessi tvö stærstu félög innan BSRB. Á sameiginlegum fundi trúnaðarmanna SFR og fulltrúa St.Rv. í nóvember fyrir tæpu ári síðan kom fram sterkur vilji til sameiningar og í vor var áfram fundað og þar urðu meðal annars til útlínur nýs félags.
Í kjölfar þess ákváðu stjórnir félaganna að efna til allsherjar atkvæðagreiðslu félagsmanna nú í nóvember. Allir virkir félagsmenn í félögunum munu geta greitt atkvæði. Atkvæðagreiðslan fer fram á sama tíma hjá báðum félögum og þarf meirihluti í báðum félögum að samþykkja sameiningu til að af henni verði.
