Mikilvæg vinna vegna Salek heldur áfram

Fulltrúar BSRB voru meðal um 70 þátttakenda á stórum fundi með þjóðfundarsniði sem haldinn var á mánudag. Þar ræddu fulltrúar vinnumarkaðarins um nýtt kjarasamningsmódel og komu fram með ábendingar sem munu nýtast við vinnu Salek-hópsins.

Fundarmönnum var skipt á níu borð. Á hverju borði fóru fram umræður og hugmyndavinna þar sem markmiðið var að fá fram hugmyndir og skoðanir á vinnu við nýtt kjarasamningsmódel.

Eftir hádegishlé flutti Dr. Steinar Holden, prófessor við Oslóarháskóla, erindi þar sem hann fjallaði um hvernig kjaraviðræður á Íslandi eru frábrugnar því sem þekkist á hinum Norðurlöndunum. Hann fór yfir hvernig vinnumarkaðurinn í Noregi, Danmörku og Svíþjóð ákvað á tíunda áratug síðastu aldar að stefna að samningum sem hefðu í för með sér litla verðbólgu og litlar verðhækkanir. Þá ræddi hann þær áskoranir sem gætu fylgt því að reyna að búa til nýtt kerfi hér á landi sem að einhverju leyti byggt á norrænni fyrirmynd.

Eftir erindi Holden fengu fundarmenn það hlutverk að fjalla um þrjár mismunandi spurningar sem sprottnar voru upp úr vinnu hans. Ætlunin er að niðurstöðurnar nýtist Holden, sem nú vinnur að skýrslu sem nota á sem innlegg í vinnuna hér á landi.

Fleiri myndir frá fundinum má sjá á Facebook-síðu BSRB.