Úttektarnefnd Landssamtaka lífeyrissjóðanna er tekin til starfa, en henni er ætlað að "gera útekt á fjárfestingastefnu, ákvarðanatöku og lagalegu umhverfi lífeyrissjóðanna í aðdraganda bankahrunsins í nóvember 2008," líkt og segir í samþykkt um nefndina. Um þriggja manna nefnd er að ræða og tilnefndi ríkissáttasemjari alla í nefndina, að ósk stjórnar landssamtakanna.

Félagar í Landssambandi slökkviliðs- og sjúkraflutningamanna hafa samþykkt nýgerðan kjarasamning við launanefnd sveitarfélaga í almennri atkvæðagreiðslu. Naumt var á munum, en alls sögðu 109 já en 100 nei. Alls voru 237 á kjörskrá en atkvæði greiddu 213, eða 90%. Auðir seðlar og ógildir voru 4. Samningurinn hefur því verið samþykktur og frekari aðgerðum aflýst, en allsherjarverkfall hefði verið boðað í upphafi þessa mánaðar hefðu samningar ekki náðst. Samningurinn gildir til 30. nóvember.

Stjórn BSRB mótmælir harðlega umfangsmiklum hækkunum á gjaldskrá Orkuveitu Reykjavíkur. Þær hafa áhrif til hækkunar vísitölu og þar með talið vísitölutengdra lána og koma því almenningi sérstaklega illa. Með þeim veikir stjórn OR þá tilraun til stöðugleika sem reynt hefur verið að koma á í samfélaginu og býður þeirri hættu heim að aðrir fylgi í kjölfarið með gjaldskrárhækkanir.